വന്ദേഭാരത് ഭക്ഷണത്തില്‍ പാറ്റയെ കണ്ടെത്തിയെന്ന് പരാതി
മഹാരാഷ്ട്രയില്‍ വന്ദേഭാരത് ഭക്ഷണത്തില്‍ പാറ്റയെ കണ്ടെത്തിയതായി മുംബൈ സ്വദേശിയായ യാത്രക്കാരന്‍.
മുംബൈ: മഹാരാഷ്ട്രയില്‍ വന്ദേഭാരത് ഭക്ഷണത്തില്‍ പാറ്റയെ കണ്ടെത്തിയതായി മുംബൈ സ്വദേശിയായ യാത്രക്കാരന്‍. ഇക്കഴിഞ്ഞ ജൂണില്‍ വന്ദേഭാരത് തീവണ്ടിയിലെ ഭക്ഷണത്തില്‍ പാറ്റയെ കണ്ടെത്തിയതായി പരാതിയുയര്‍ന്നതിന് പിന്നാലെയാണ് ഈ സംഭവം.
മഹാരാഷ്ട്രയിലെ ഷിര്‍ദിയില്‍ നിന്ന് മുംബൈയിലേക്കുള്ള യാത്രക്കിടയില്‍ വിളമ്ബിയ ദാലിലാണ് പാറ്റയെ കണ്ടെത്തിയതായി യാത്രക്കാരന്‍ പോസ്റ്റില്‍ പറയുന്നത്. വന്ദേഭാരത് തീവണ്ടികളില്‍ വിളമ്ബുന്ന വൃത്തിഹീനമായ ഭക്ഷണങ്ങള്‍ക്കെതിരെ 2023 ഏപ്രിലിനും 2024 ഫെബ്രുവരിക്കുമിടയില്‍ 123 പരാതികളാണ് റെയില്‍വേക്ക് ലഭിച്ചത്.
കുടംബത്തോടൊപ്പം യാത്രചെയ്യുകയായിരുന്ന റിക്കി ജെസ്വാനി എന്നയാളുടെ സഹോദരിക്ക് അത്താഴമായി വിളമ്ബിയ ഭക്ഷണത്തിലാണ് പാറ്റയെ കണ്ടെത്തിയതെന്ന് ഇദ്ദേഹം എക്സില് പങ്കുവെച്ച പോസ്റ്റില്‍ പറയുന്നു. ഐ.ആര്‍.സി.ടി.സിക്ക് പരാതി എഴുതിനല്‍കിയിട്ടുണ്ട്.
വൃത്തിഹീനമായ ഭക്ഷണത്തിന്റെയും എഴുതി നല്‍കിയ പരാതിയുടേയും ഫോട്ടോയും വീഡിയോയും മറ്റൊരാളാണ് എക്സില് പങ്കുവെച്ചത്. ഓഗസ്റ്റ് 19-നാണ് സംഭവമുണ്ടായത്. യാത്രക്കിടയിലെ അത്താഴത്തിന് വിളമ്ബിയ ദാലില്‍ പാറ്റയെ കണ്ടെത്തിയെന്നും മാനേജര്‍ എത്തി സ്ഥിരീകരിച്ചുവെന്നും ഇതാണോ പുതിയ ഇന്ത്യയെന്നും എക്സില് പങ്കുവെച്ച പോസ്റ്റില്‍ റിക്കി ജസ്വാനി ചോദിക്കുന്നു.
ഇദ്ദേഹത്തിന്റെ പോസ്റ്റ് വൈറലായതോടെ പ്രതികരണവുമായി റെയില്‍വേ രംഗത്തെത്തി. 'നിങ്ങള്‍ക്ക് നേരിട്ട അസൗകര്യത്തിന് ക്ഷമ ചോദിക്കുന്നു. സേവനം നല്‍കുന്ന ആള്‍ക്ക് പെനാല്‍റ്റി നല്‍കിയിട്ടുണ്ട്. ഭക്ഷണം പാചകം ചെയ്യുന്ന യൂണിറ്റ് പരിശോധിക്കാനായി അധികൃതരെ നിയമിച്ചിട്ടുണ്ടെന്നും റെയില്‍വേയുടെ മറുപടി പോസ്റ്റില്‍ പറയുന്നു.ഇതേ ട്രെയിനില്‍ യാത്രചെയ്ത മറ്റൊരാള്‍ പ്രഭാത ഭക്ഷണത്തിന് ലഭിച്ച ഭക്ഷണത്തിലെ തൈര് പഴകിയിരുന്നതായി പോസ്റ്റില്‍ കമന്റ് ചെയ്തിട്ടുണ്ട്.
ഈ വര്‍ഷം ഫെബ്രുവരിവരെ കാറ്ററിങ്ങ് സേവനങ്ങള്‍ക്കായി 1,518 കാറ്ററിങ്ങ് കോണ്‍ട്രാക്ടുകള്‍ ഐ.ആര്‍.ടി.സിക്കുണ്ടായിരുന്നതായി ദ ഹിന്ദു പുറത്തുവിട്ട റിപ്പോര്‍ട്ടില്‍ പറയുന്നു. ആയിരത്തിലധികം പരാതികള്‍ ലഭിച്ചിട്ടും മൂന്ന് വര്‍ഷത്തിനിടയില്‍ മൂന്ന് കോണ്‍ട്രാക്ടുകള്‍ മാത്രമാണ് റെയില്‍വേ പിരിച്ചുവിട്ടിട്ടുള്ളത്.
What's Your Reaction?
