സ്ത്രീകളെ ശല്യം ചെയ്തു, ഗർഭഛിദ്രത്തിന് നിർബന്ധിച്ചു; രാഹുൽ മാങ്കൂട്ടത്തിലിനെതിരെ എഫ് ഐ ആർ

സ്ത്രീകളെ പിന്തുടർന്ന് ശല്യം ചെയ്തതിനും ഗർഭഛിദ്രം നടത്താനായി ഭീഷണിപ്പെടുത്തതിനും പാലക്കാട് എംഎൽഎ രാഹുൽ മാങ്കൂട്ടത്തിൽ എം.എൽ.എ ക്കെതിരെ കേസ്. കേരള ക്രൈം ബ്രാഞ്ച് സമർപ്പിച്ച ഫസ്റ്റ് ഇൻഫർമേഷൻ റിപ്പോർട്ട് (FIR) വിവരങ്ങൾ പുറത്തുവന്നു. തിരുവനന്തപുരം ജുഡീഷ്യൽ ഫസ്റ്റ്ക്ലാസ് മജിസ്ട്രേറ്റ് കോടതിയിലാണ് ക്രൈംബ്രാഞ്ച് എഫ്‌ഐആര്‍ സമര്‍പ്പിച്ചത്.

18-നും 60-നും ഇടയിൽ പ്രായമുള്ളവരാണ് ഇരകളെന്ന് എഫ്‌ഐആറിൽ പറയുന്നു. പ്രതി സോഷ്യൽ മീഡിയ പ്ലാറ്റ്‌ഫോമുകൾ ഉപയോഗിച്ച് അവരെ പിന്തുടരുകയും സന്ദേശങ്ങളും ചാറ്റുകളും അയക്കുകയും നിർബന്ധിത ഗർഭച്ഛിദ്രത്തെക്കുറിച്ചുള്ള ഭീഷണികൾ മുഴക്കുകയും ചെയ്തതായി എഫ്‌ഐആറിൽ ആരോപിക്കുന്നു.

ഭാരതീയ ന്യായ സംഹിത (ബിഎൻഎസ്)യിലെ 78(2) (പിന്തുടർന്നതുമായി ബന്ധപ്പെട്ട വകുപ്പ്), 352 (ക്രിമിനൽ ഭീഷണിപ്പെടുത്തലുമായി ബന്ധപ്പെട്ടത്) എന്നീ വകുപ്പുകളും കൂടാതെ കേരള പോലീസ് (KP) നിയമത്തിലെ 120 (o) വകുപ്പും പ്രകാരമാണ് കേസ് രജിസ്റ്റർ ചെയ്തിട്ടുള്ളതെന്ന് ഉദ്യോഗസ്ഥർ അറിയിച്ചു.