പയ്യാമ്പലത്ത് മൂന്ന് മെഡിക്കൽ വിദ്യാർഥികൾ മുങ്ങിമരിച്ചു; അപകടം കടലില് കുളിക്കാനിറങ്ങിയപ്പോൾ
കണ്ണൂര് പയ്യാമ്പലത്ത് കടലില് കുളിക്കാനിറങ്ങിയ മൂന്നുപേർ തിരയിൽപെട്ട് മുങ്ങി മരിച്ചു. കര്ണാടക സ്വദേശികളായ മെഡിക്കൽ വിദ്യാർഥികളാണ് മരിച്ചത്. ബെംഗളൂരുവിൽ മെഡിക്കൽ വിദ്യാർഥികളായ അഫ്നാൻ, റഹാനുദ്ദീൻ, അഫ്റാസ് എന്നിവരാണ് മരിച്ചത്. ഞായറാഴ്ച രാവിലെയാണ് സംഭവം.
എട്ടുപേരടങ്ങുന്ന സംഘം പയ്യാമ്പലത്തെ റിസോര്ട്ടില് താമസിച്ചുവരികയായിരുന്നു. രാവിലെ എട്ടംഗസംഘം കടലില് കുളിക്കാനിറങ്ങി. ഇതിനിടെയാണ് മൂന്നുപേര് തിരയില്പ്പെട്ടത്. ഇതിൽ രണ്ടുപേരെ നാട്ടുകാരും മറ്റുള്ളവരും ചേര്ന്ന് രക്ഷപ്പെടുത്തി. എന്നാൽ ഇവരുടെ നില അതീവഗുരുതരമായിരുന്നു. ഇവരെ ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല.അഫ്റാസാണ് ആദ്യം കടലിൽ ഇറങ്ങിയത്. ഒഴുക്കിൽപ്പെട്ടതോടെ മറ്റു 2 പേർ രക്ഷിക്കാന് ഇറങ്ങി. പിന്നാലെ ഇരുവരും ഒഴുക്കിൽപ്പെടുകയായിരുന്നു. അപകടം തിരിച്ചറിഞ്ഞ സംഘത്തിലെ മറ്റുള്ളവർ നാട്ടുകാരെയും മത്സ്യത്തൊഴിലാളികളെയും അറിയിച്ചു.
