ബംഗാള് ഉള്ക്കടലില് അതിതീവ്ര ന്യൂനമര്ദ്ദ സാധ്യത
പ്രസിദ്ധീകരിച്ചത്: 22 Sep, 2026
ബംഗാള് ഉള്ക്കടലില് അതിതീവ്ര ന്യൂനമര്ദ്ദ സാധ്യത നിലനില്ക്കുന്നതിനാല് കേരളത്തില് മഴ തുടരുമെന്ന് കേന്ദ്രകാലാവസ്ഥാ വകുപ്പിന്റെ മുന്നറിയിപ്പ്.
മധ്യ തമിഴ്നാടിന് സമീപത്തായി ചക്രവാതച്ചുഴിയും നിലനില്ക്കുന്നുണ്ട്. നിലവില് ബംഗാള് ഉള്ക്കടലിന് മുകളിലുള്ള ന്യൂനമര്ദ്ദം അടുത്ത 24 മണിക്കൂറില് തീവ്ര ന്യൂനമര്ദ്ദമായി ശക്തി പ്രാപിക്കും.
മുന്കരുതലിന്റെ ഭാഗമായി ബുധനാഴ്ച തിരുവനന്തപുരം, കൊല്ലം, പത്തനംതിട്ട ജില്ലകളിലും വ്യാഴാഴ്ച മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലും വെള്ളിയാഴ്ച തിരുവനന്തപുരം, കൊല്ലം, പത്തനംതിട്ട, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലും യെല്ലോ അലേര്ട്ട് പ്രഖ്യാപിച്ചു.
