‘തുടർഭരണം പാർട്ടിയിൽ അഹങ്കാരമുണ്ടാക്കി'; തിരുത്തലുകൾ നേരത്തെ വേണമായിരുന്നുവെന്ന് തോമസ് ഐസക്ക്

കേരളത്തിലെ സിപിഐഎമ്മിന്റെ സംഘടനാപരമായ ദൗർബല്യങ്ങൾ ഒരു ദിവസം കൊണ്ട് ഉണ്ടായതല്ലെന്നും പല തിരുത്തലുകളും നേരത്തെ തന്നെ നടത്താമായിരുന്നുവെന്നും കേന്ദ്ര കമ്മിറ്റിയംഗം ഡോ. ടി.എം. തോമസ് ഐസക്ക്. തെരഞ്ഞെടുപ്പിലുണ്ടായ അപ്രതീക്ഷിത തിരിച്ചടിയാണ് ആവശ്യമായ തിരുത്തലുകൾക്ക് കാരണമായതെന്നും അദ്ദേഹം പറഞ്ഞു.

തുടർച്ചയായി പത്ത് വർഷം അധികാരത്തിലിരുന്നത് കേരളത്തിൽ ആദ്യ അനുഭവമാണെന്നും ദീർഘകാലത്തെ തുടർഭരണം സ്വാഭാവികമായും അഹങ്കാരത്തിലേക്ക് നയിക്കാനുള്ള സാധ്യതയുണ്ടെന്നും തോമസ് ഐസക്ക് ചൂണ്ടിക്കാട്ടി. ബംഗാളിൽ സംഭവിച്ച വലിയ തിരിച്ചടിയെക്കുറിച്ച് കഴിഞ്ഞ പത്ത് വർഷത്തിനിടെ നടന്ന പാർട്ടി സമ്മേളനങ്ങളിൽ മുന്നറിയിപ്പ് നൽകിയിരുന്നു. ജാഗ്രത വേണമെന്ന് ഓർമിപ്പിച്ചിട്ടും പിന്നീട് ഉദാസീനമായ സമീപനം ഉണ്ടായെന്നും മലയാള മനോരമയ്ക്ക് നൽകിയ അഭിമുഖത്തിൽ അദ്ദേഹം പറഞ്ഞു.