കരാർ കമ്പനി പിന്മാറി; കോഴിക്കോട് അടക്കം മൂന്ന് സ്റ്റേഷനുകളിലെ റെയിൽവേ ഫുഡ് ട്രക്ക് പദ്ധതി പ്രതിസന്ധിയിൽ

പാലക്കാട് ഡിവിഷനിലെ പ്രധാന മൂന്ന് റെയിൽവേ സ്റ്റേഷനുകളിൽ ആരംഭിക്കാനിരുന്ന ഫുഡ് ട്രക്ക് പദ്ധതിക്ക് തിരിച്ചടി. അഞ്ച് വർഷത്തേക്ക് നിർദ്ദിഷ്ട കരാർ സ്വന്തമാക്കിയ ഈറോഡ് ആസ്ഥാനമായുള്ള 'ജെസിസ് ഫുഡ് കോർട്ട്' എന്ന കമ്പനി പദ്ധതിയിൽ നിന്ന് പിന്മാറുന്നതായി റെയിൽവേയ്ക്ക് രേഖാമൂലം കത്ത് നൽകി. ഇതോടെ കോഴിക്കോട്, പാലക്കാട്, തിരൂർ എന്നീ സ്റ്റേഷനുകളിൽ ആരംഭിക്കാനിരുന്ന പദ്ധതി അനിശ്ചിതത്വത്തിലായി.

ടെമ്പോ ട്രാവലറിന് സമാനമായ ട്രക്കിൽ അടുക്കളയും ഭക്ഷണസാധനങ്ങളും ഒരുക്കി, സമീപത്ത് ഷീറ്റ് ഇട്ട് ഭക്ഷണം കഴിക്കാനുള്ള സൗകര്യമടക്കം സ്ഥാപിക്കാനായിരുന്നു പ്ലാൻ. എന്നാൽ ഭക്ഷണവസ്തുക്കൾ സൂക്ഷിക്കാനുള്ള ട്രക്കും അനുബന്ധ സൗകര്യങ്ങളും ഒരുക്കാൻ മാത്രം 16 മുതൽ 17 ലക്ഷം രൂപ വരെ നിക്ഷേപമായി ചെലവ് വരുമെന്ന് കരാർ കമ്പനി ചൂണ്ടിക്കാട്ടുന്നു.

അഞ്ച് വർഷത്തെ കാലാവധി കൊണ്ട് ഈ തുകയും ലാഭവും തിരിച്ചെടുക്കാൻ സാധിക്കില്ലെന്ന് കണ്ടതോടെയാണ് പിന്മാറാൻ തീരുമാനിച്ചതെന്ന് കമ്പനി വ്യക്തമാക്കി.