റഷ്യൻ എണ്ണ ഇറക്കുമതിക്ക് തടയിടാൻ യുഎസ് തന്ത്രം

റഷ്യയിൽ നിന്ന് ക്രൂഡ് ഓയിലും പ്രകൃതിവാതകവും വാങ്ങുന്നത് തുടരുന്ന രാജ്യങ്ങൾക്കെതിരെ കടുത്ത സാമ്പത്തിക ഉപരോധം ഏർപ്പെടുത്താനുള്ള ബില്ലിന് അമേരിക്കൻ ജനപ്രതിനിധി സഭയുടെ അംഗീകാരം ലഭിച്ചു. റഷ്യൻ ഊർജ്ജ ഉൽപ്പന്നങ്ങൾ വൻതോതിൽ ഇറക്കുമതി ചെയ്യുന്ന ഇന്ത്യ ഉൾപ്പെടെയുള്ള രാജ്യങ്ങൾക്കും മേൽ നൂറ് ശതമാനം തീരുവ ചുമത്താൻ ഈ ബിൽ അനുവാദം നൽകുന്നു.

യുഎസ് ജനപ്രതിനിധി സഭയിൽ നടന്ന നടപടിക്രമ വോട്ടെടുപ്പിൽ നേരിയ ഭൂരിപക്ഷത്തോടെയാണ് ഉപരോധ ബിൽ പാസാക്കിയത്. ഡെമോക്രാറ്റിക് ജനപ്രതിനിധികളുടെ കടുത്ത എതിർപ്പിനിടയിലും റിപ്പബ്ലിക്കൻ പാർട്ടി മുന്നോട്ടുവെച്ച ഈ നിർണായക ബിൽ പ്രതിനിധി സഭ കടക്കുകയായിരുന്നു.

ഇതോടെ അമേരിക്കൻ പ്രസിഡന്റ് ഡൊണാൾഡ് ട്രംപിന് ഇന്ത്യ അടക്കമുള്ള രാജ്യങ്ങളിൽ നിന്നുള്ള ഇറക്കുമതിക്ക് 100 ശതമാനം വരെ ഇറക്കുമതി തീരുവ ചുമത്താനുള്ള സമ്പൂർണ അധികാരം ലഭിക്കും. ലിൻഡ്സെ ഒ ഗ്രഹാം ഉപരോധ ബിൽ എന്നാണ് ഈ പുതിയ നിയമനിർമ്മാണം അറിയപ്പെടുന്നത്.

റഷ്യയിൽ നിന്നും ഇറാൻ നിന്നുമുള്ള ഊർജ്ജ ഇറക്കുമതി പൂർണ്ണമായി തടയുക എന്ന ലക്ഷ്യത്തോടെയാണ് ഈ ബിൽ തയ്യാറാക്കിയിരിക്കുന്നത്. റഷ്യൻ എണ്ണ ഏറ്റവും കൂടുതലായി വാങ്ങുന്ന അഞ്ച് മുൻനിര രാജ്യങ്ങളെ ലക്ഷ്യമിട്ടാണ് ഈ നികുതി വ്യവസ്ഥകൾ പ്രാബല്യത്തിൽ കൊണ്ടുവരുന്നത്.

ചൈനയും ഇന്ത്യയും തന്നെയാണ് റഷ്യൻ കടൽമാർഗ്ഗ ക്രൂഡ് ഓയിലിന്റെ ഏറ്റവും വലിയ ഉപഭോക്താക്കൾ എന്നതിനാൽ ഈ പുതിയ ബിൽ നടപ്പിലായാൽ ഇന്ത്യയെ അത് വൻതോതിൽ ബാധിച്ചേക്കാം. വാഷിംഗ്ടണും ന്യൂഡൽഹിയും തമ്മിലുള്ള ഉഭയകക്ഷി വ്യാപാര ബന്ധത്തിൽ വലിയ ആശങ്ക സൃഷ്ടിക്കുന്ന ഒന്നാണിത്.

നേരത്തെ ഓഗസ്റ്റ് മാസത്തിൽ യുഎസ് സെനറ്റ് വൻ ഭൂരിപക്ഷത്തോടെ ഈ ബിൽ പാസാക്കിയിരുന്നു. ജനപ്രതിനിധി സഭയിൽ കൂടി അന്തിമ വോട്ടെടുപ്പ് പൂർത്തിയാകുന്നതോടെ ഉപരോധ ബിൽ നിയമമായി മാറും.