ഉക്രെയ്നിലേക്ക് ഇന്ത്യൻ സൈന്യത്തെ അയക്കാൻ ജെഡി വാൻസിന്റെ നിർദ്ദേശം

ഉക്രെയ്നിലെ യുദ്ധം അവസാനിപ്പിക്കാൻ സമാധാന ദൗത്യത്തിന്റെ ഭാഗമായി ഇന്ത്യൻ സൈന്യത്തെ വിന്യസിക്കാൻ അമേരിക്കൻ വൈസ് പ്രസിഡന്റ് ജെഡി വാൻസ് നിർദ്ദേശിച്ചതായി പുതിയ വെളിപ്പെടുത്തൽ. അടുത്തിടെ പുറത്തിറങ്ങിയ പുസ്തകത്തിലാണ് വൈറ്റ് ഹൗസിലെ ഉന്നതതല യോഗത്തിൽ നടന്ന ഈ ചർച്ചയെക്കുറിച്ചുള്ള ഞെട്ടിക്കുന്ന വിവരങ്ങൾ ഉള്ളത്. റഷ്യ-ഉക്രെയ്ൻ യുദ്ധത്തിൽ വെടിനിർത്തൽ ഉറപ്പാക്കാൻ നാറ്റോ ഇതര രാജ്യങ്ങളുടെ പിന്തുണ തേടുന്നത് ഉചിതമായിരിക്കുമെന്നായിരുന്നു വാൻസിന്റെ പക്ഷം.

യുക്രെയ്നിൽ സമാധാനം പുനഃസ്ഥാപിക്കാൻ ലക്ഷ്യമിട്ടുള്ള ഒരു നിർദ്ദേശമാണ് വൈറ്റ് ഹൗസിൽ ചർച്ച ചെയ്തത്. ഇതിനായി നാറ്റോ അംഗമല്ലാത്ത രാജ്യങ്ങളിൽ നിന്ന് സമാധാന സേനയെ കണ്ടെത്തണമെന്നും വാൻസ് നിർദ്ദേശിച്ചു. അപ്പോഴാണ് ഇന്ത്യയുടെയും സൗദി അറേബ്യയുടെയും പേരുകൾ വാൻസ് പരാമർശിച്ചത്.

ഈ നിർദ്ദേശം കേട്ട ഉടൻ തന്നെ അമേരിക്കൻ പ്രസിഡന്റ് ഡൊണാൾഡ് ട്രംപ് ചിരിക്കുകയായിരുന്നു എന്ന് പുസ്തകം പറയുന്നു. ഇന്ത്യ അത്തരമൊരു നീക്കത്തിന് തയ്യാറാകില്ലെന്ന് ട്രംപ് ഉറപ്പിച്ചു പറഞ്ഞു. ഇന്ത്യക്കാർ ഒരിക്കലും ഇത്തരം കാര്യങ്ങൾക്ക് പണം ചിലവാക്കാറില്ലെന്നും താൻ പ്രധാനമന്ത്രി നരേന്ദ്ര മോദിയുമായി നല്ല ബന്ധം പുലർത്തുന്നുണ്ടെന്നും ട്രംപ് കൂട്ടിച്ചേർത്തു.