ഡൽഹിയിലെ ആകാശത്ത് ദൃശ്യമായത് ഉൽക്കയല്ല! സംഭവം ഇങ്ങനെ
രാജ്യതലസ്ഥാനത്തിന്റെ ആകാശത്ത് വിചിത്രമായൊരു ജ്വാല കഴിഞ്ഞ ദിവസം ദൃശ്യമായിരുന്നു. ശനിയാഴ്ച രാത്രി ഡൽഹി എന്സിആര് മേഖലയാകെ ദൃശ്യമായ ഈ കാഴ്ച ഉല്ക്കാ ജ്വലനത്തിന്റെതാണ് എന്നായിരുന്നു വ്യാപകമായ പ്രചാരണം. 'ബോളിഡ്' ഉല്ക്കയാണിതെന്നും അഭ്യൂഹങ്ങളുണ്ടായിരുന്നു.
എന്നാല് ഒരു ചൈനീസ് റോക്കറ്റിന്റെ മൂന്നാം ഭാഗത്തിന്റെയോ സാറ്റ്ലൈറ്റിന്റെയോ അവശിഷ്ടങ്ങള് കത്തുന്നതിന്റെ ദൃശ്യങ്ങളാണെന്നാണ് പുറത്തു വരുന്ന പുതിയ റിപ്പോർട്ടുകൾ. ചൈനയുടെ ലോംഗ് മാർച്ച് 3B റോക്കറ്റ് സ്റ്റേജിൽ (CZ-3B R/B, ID 61188) നിന്നുള്ള അവശിഷ്ടങ്ങളാണെന്ന് സംശയിക്കുന്നുവെന്ന് എയ്റോസ്പേസ് കോർപ്പറേഷന്റെ ഡാറ്റ പറയുന്നു.രാത്രി ആകാശത്ത് വേഗത്തിൽ നീങ്ങുന്ന ഒരു തിളക്കമുള്ള വസ്തുവിനെ കണ്ടുവെന്നാണ് ഡൽഹി എൻസിആർ, ഗുരുഗ്രാം, പടിഞ്ഞാറൻ രാജസ്ഥാൻ വരെ വ്യാപിച്ചുകിടക്കുന്ന പ്രദേശങ്ങളിൽ നിന്നുള്ള ദൃക്സാക്ഷികൾ പറഞ്ഞത്. വാൽനക്ഷ്രമാണ് ഇതെന്നും സംശയം ഉയർന്നിരുന്നു. വീഡിയോ വൈറലായതിന് പിന്നാലെ ഉൽക്കയാണോ അതോ മനുഷ്യനിർമ്മിത ബഹിരാകാശ അവശിഷ്ടമാണോ എന്നതിനെക്കുറിച്ചുള്ള ചർച്ചകൾക്ക് തുടക്കമിട്ടു.
