ബംഗാളിലെ ഹൗറയിൽ വോട്ടെടുപ്പിന് പിന്നാലെ വ്യാപക അക്രമം

പശ്ചിമ ബംഗാളിൽ നിയമസഭാ തിരഞ്ഞെടുപ്പിന് പിന്നാലെയുണ്ടായ രാഷ്ട്രീയ അക്രമങ്ങൾ അതീവ ഗുരുതരമാകുന്നു. ഹൗറയിലെ ഷിബ്പൂർ മേഖലയിൽ ഒരു സംഘം ആളുകൾ ബോംബെറിയുന്നതിന്റെയും സ്വത്തുക്കൾ നശിപ്പിക്കുന്നതിന്റെയും ദൃശ്യങ്ങൾ പുറത്തുവന്നു. ഷിബ്പൂരിലെ ചൗരബസ്തി മേഖലയിൽ നടന്ന അക്രമത്തിന് പിന്നിൽ തൃണമൂൽ കോൺഗ്രസ് (ടിഎംസി) പ്രവർത്തകരാണെന്ന് ബിജെപി ആരോപിച്ചു. ആക്രമണത്തിൽ രണ്ട് ബിജെപി പ്രവർത്തകർക്ക് പരിക്കേറ്റതായാണ് റിപ്പോർട്ട്.ഷിബ്പൂരിലെ ഇടുങ്ങിയ തെരുവുകളിൽ സ്ഫോടനങ്ങൾ നടക്കുന്നതിന്റെയും പുക ഉയരുന്നതിന്റെയും ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. ഒരു കൂട്ടം ആളുകൾ മതപരമായ മുദ്രാവാക്യങ്ങൾ വിളിച്ചുകൊണ്ട് പ്രദേശത്ത് ഭീതി പടർത്തുന്നതും ദൃശ്യങ്ങളിൽ കാണാം. അക്രമത്തിൽ പൊതുമുതൽ നശിപ്പിക്കപ്പെട്ടതായും പ്രദേശത്ത് കടുത്ത സംഘർഷാവസ്ഥ നിലനിൽക്കുന്നതായും റിപ്പോർട്ടുകൾ വ്യക്തമാക്കുന്നു.