ഇന്ധനവില പിടിച്ചുനിർത്താൻ ട്രംപിന്റെ നിർണ്ണായക നീക്കം; കപ്പൽ ഗതാഗത നിയമങ്ങളിൽ വീണ്ടും ഇളവ് പ്രഖ്യാപിച്ചു

അമേരിക്കയിൽ ഇന്ധന വിലയും ഊർജ്ജ പ്രതിസന്ധിയും പരിഹരിക്കുന്നതിനായി കപ്പൽ ഗതാഗത നിയമങ്ങളിൽ വരുത്തിയ ഇളവുകൾ പ്രസിഡന്റ് ഡൊണാൾഡ് ട്രംപ് 90 ദിവസത്തേക്ക് കൂടി നീട്ടി. ഇറാനുമായുള്ള സംഘർഷത്തെത്തുടർന്ന് ഹോർമുസ് കടലിടുക്കിലുണ്ടായ തടസ്സങ്ങൾ ആഗോള ഊർജ്ജ വിപണിയെ ബാധിച്ച സാഹചര്യത്തിലാണ് ഈ തീരുമാനം.

കപ്പൽ ഗതാഗതത്തിനുള്ള ജോൺസ് ആക്ട് പ്രകാരം അമേരിക്കൻ തുറമുഖങ്ങൾക്കിടയിൽ ചരക്ക് നീക്കം നടത്താൻ അമേരിക്കൻ കപ്പലുകൾ മാത്രമേ പാടുള്ളൂ എന്നാണ് നിയമം. എന്നാൽ നിലവിലെ അടിയന്തര സാഹചര്യം കണക്കിലെടുത്ത് വിദേശ കപ്പലുകൾക്കും ചരക്ക് നീക്കത്തിന് ട്രംപ് ഭരണകൂടം അനുമതി നൽകി.
എണ്ണ, പ്രകൃതിവാതകം, വളം തുടങ്ങിയ അവശ്യവസ്തുക്കളുടെ ലഭ്യത ഉറപ്പാക്കാനാണ് ഈ നടപടിയിലൂടെ ലക്ഷ്യമിടുന്നത്. ആദ്യഘട്ടത്തിൽ നൽകിയ ഇളവ് മെയ് 17-ന് അവസാനിക്കാനിരിക്കെയാണ് ആഗസ്റ്റ് പകുതി വരെ കാലാവധി നീട്ടി നൽകിയിരിക്കുന്നത്.

ശ്ചിമേഷ്യയിലെ യുദ്ധസാഹചര്യം ഇന്ധന വിതരണ ശൃംഖലയെ സാരമായി ബാധിച്ചിട്ടുണ്ട്. ഇത് അമേരിക്കയിലെ ആഭ്യന്തര വിപണിയിൽ പെട്രോൾ, ഡീസൽ വില വർധിക്കാൻ കാരണമായത് ട്രംപ് ഭരണകൂടത്തിന് വലിയ വെല്ലുവിളിയായിരുന്നു.
പുതിയ കണക്കുകൾ പ്രകാരം നിയമത്തിൽ ഇളവ് നൽകിയത് വഴി അമേരിക്കൻ തുറമുഖങ്ങളിലേക്ക് വേഗത്തിൽ ഇന്ധനം എത്തിക്കാൻ സാധിച്ചിട്ടുണ്ട്. വിപണിയിൽ സ്ഥിരതയും നിശ്ചിതത്വവും കൊണ്ടുവരാൻ 90 ദിവസത്തെ ഈ നീട്ടിനൽകൽ സഹായിക്കുമെന്ന് വൈറ്റ് ഹൗസ് വക്താവ് വ്യക്തമാക്കി.