ലക്ഷക്കണക്കിന് മലയാളികളുടെ രണ്ടാമത്തെ വീടാണ് ഗൾഫ്: മുഖ്യമന്ത്രി പിണറായി വിജയൻ

ഗൾഫ് മേഖലയിലെ വർദ്ധിച്ചുവരുന്ന പ്രതിസന്ധിയിൽ ആശങ്ക പ്രകടിപ്പിച്ച് മുഖ്യമന്ത്രി പിണറായി വിജയൻ. ഗൾഫ് രാജ്യങ്ങളോടും അവിടുത്തെ ജനങ്ങളോടും അദ്ദേഹം കേരളത്തിന്റെ ഐക്യദാർഢ്യം അറിയിക്കുകയും ചെയ്തു. ഗൾഫിലെ സംഭവവികാസങ്ങൾ കേരളത്തിൽ കടുത്ത ഉത്കണ്ഠ സൃഷ്ടിക്കുന്നുണ്ടെന്ന് അദ്ദേഹം ഫേസ്ബുക്ക് പോസ്റ്റിൽ പറഞ്ഞു.

ലക്ഷക്കണക്കിന് മലയാളികളുടെ രണ്ടാമത്തെ വീടാണ് ഈ മേഖലയെന്ന് അദ്ദേഹം ചൂണ്ടിക്കാട്ടി. അവരുടെ കഠിനാധ്വാനവും വിയർപ്പും ഈ മേഖലയുടെ വളർച്ചയെ രൂപപ്പെടുത്തിയിട്ടുണ്ട്. കേരളത്തിലെ മിക്കവാറും എല്ലാ വീടുകളിലും ഗൾഫുമായി ബന്ധപ്പെട്ട ഒരാളെങ്കിലും ഉണ്ടെന്ന് പറയുന്നത് അതിശയോക്തിയല്ല. ഗൾഫ് രാജ്യങ്ങളിൽ സമാധാനവും സ്ഥിരതയും നിലനിൽക്കുമെന്നും മനുഷ്യത്വത്തിന്റെയും പരസ്പര ധാരണയുടെയും അടിസ്ഥാനത്തിൽ ബുദ്ധിപരമായ തീരുമാനങ്ങളിലൂടെ അവരുടെ നേതാക്കൾ പ്രതിസന്ധി മറികടക്കുമെന്നും മുഖ്യമന്ത്രി പ്രത്യാശ പ്രകടിപ്പിച്ചു.