കേന്ദ്രത്തിന് മറുപടിയുമായി എം.കെ. സ്റ്റാലിൻ; തമിഴ്നാട് സ്വന്തമായി ദേശീയ സാഹിത്യ പുരസ്കാരങ്ങൾ പ്രഖ്യാപിച്ചു

കേന്ദ്ര സർക്കാരും തമിഴ്‌നാടും തമ്മിലുള്ള രാഷ്ട്രീയ തർക്കം സാഹിത്യ മേഖലയിലേക്കും പടരുന്നു. കേന്ദ്ര സാംസ്കാരിക മന്ത്രാലയം കഴിഞ്ഞ വർഷത്തെ സാഹിത്യ അക്കാദമി പുരസ്കാരങ്ങൾ റദ്ദാക്കിയതിൽ പ്രതിഷേധിച്ച് തമിഴ്‌നാട് സർക്കാർ സ്വന്തമായി ദേശീയ തലത്തിലുള്ള സാഹിത്യ പുരസ്കാരങ്ങൾ പ്രഖ്യാപിച്ചു. 'സെമ്മൊഴി സാഹിത്യ പുരസ്കാരം' (Semmozhi Literary Award) എന്ന പേരിലാണ് ഈ അവാർഡുകൾ അറിയപ്പെടുകയെന്ന്  അറിയിച്ചു.ചെന്നൈ അന്താരാഷ്ട്ര പുസ്തകോത്സവത്തിന്റെ സമാപന ചടങ്ങിലാണ് സ്റ്റാലിൻ ഈ പ്രഖ്യാപനം നടത്തിയത്. ആദ്യ ഘട്ടത്തിൽ തമിഴ്, തെലുങ്ക്, കന്നഡ, മലയാളം, ഒഡിയ, ബംഗാളി, മറാത്തി എന്നീ ഏഴ് ഭാഷകളിലെ മികച്ച കൃതികൾക്കാണ് പുരസ്കാരം നൽകുക. ഓരോ ഭാഷയിലെയും മികച്ച കൃതിക്ക് അഞ്ച് ലക്ഷം രൂപ വീതമാണ് സമ്മാനത്തുകയായി ലഭിക്കുക.

കഴിഞ്ഞ ഡിസംബറിൽ സാംസ്കാരിക മന്ത്രാലയത്തിന്റെ നിർദ്ദേശപ്രകാരം 2025-ലെ സാഹിത്യ അക്കാദമി പുരസ്കാരങ്ങൾ പ്രഖ്യാപിക്കുന്നത് കേന്ദ്രം തടഞ്ഞിരുന്നു. ഇത് രാഷ്ട്രീയ പ്രേരിതമാണെന്നും കലയിലും സംസ്കാരത്തിലും കേന്ദ്രം ഇടപെടുകയാണെന്നും സ്റ്റാലിൻ ആരോപിച്ചു.

കേന്ദ്രത്തിന്റെ രാഷ്ട്രീയ ഇടപെടലും ദീർഘവീക്ഷണമില്ലായ്മയും കാരണമാണ് ഈ വർഷത്തെ സാഹിത്യ അക്കാദമി അവാർഡുകൾ പ്രഖ്യാപിക്കാത്തതെന്ന് അദ്ദേഹം എക്സിൽ (X) കുറിച്ചു. ഇതിനുള്ള ഉചിതമായ മറുപടിയായി തമിഴ്‌നാട് സർക്കാർ തന്നെ എല്ലാ വർഷവും ഈ പുരസ്കാരങ്ങൾ നൽകുമെന്നും അദ്ദേഹം വ്യക്തമാക്കി.

വിവിധ എഴുത്തുകാരും സാഹിത്യ സംഘടനകളും ഇത്തരം ഒരു നടപടി സ്വീകരിക്കാൻ തന്നോട് ആവശ്യപ്പെട്ടതായി സ്റ്റാലിൻ വെളിപ്പെടുത്തി. ഇന്ത്യൻ സാഹിത്യത്തിന്റെ രക്ഷാധികാരി എന്ന നിലയിലുള്ള ഉത്തരവാദിത്തം ഏറ്റെടുക്കുന്നതിൽ തമിഴ്‌നാട് സർക്കാർ സന്തോഷിക്കുന്നുവെന്നും അദ്ദേഹം കൂട്ടിച്ചേർത്തു