മഹാ കുംഭമേളയിൽ തിക്കിലും തിരക്കിലും പെട്ട് 30 പേർ മരിച്ചു; 60 പേർക്ക് പരിക്കേറ്റു

ബുധനാഴ്ച പുലർച്ചെ പ്രയാഗ്‌രാജിൽ മഹാകുംഭമേളയ്ക്കിടെ തിക്കിലും തിരക്കിലും പെട്ട് മരിച്ചവരുടെ എണ്ണം പുറത്തുവിട്ട് സർക്കാർ. 30 പേർ കൊല്ലപ്പെടുകയും 60 പേർക്ക് പരിക്കേൽക്കുകയും ചെയ്തു. രണ്ടാം ഷാഹി സ്നാൻ (രാജകീയ സ്നാനം) ദിനമായ മൗനി അമാവാസിയിൽ പുണ്യസ്നാനം നടത്താൻ ത്രിവേണി സംഗമത്തിൽ ആയിരക്കണക്കിന് ഭക്തർ തടിച്ചുകൂടിയപ്പോഴാണ് സംഭവം.

"പുലർച്ചെ 1മണിക്കും 2 മണിക്കും ഇടയിൽ ഉണ്ടായ തിക്കിലും തിരക്കിലും 30 പേർ മരിച്ചു. 25 പേരെ തിരിച്ചറിഞ്ഞു, ബാക്കി 5 പേരെ തിരിച്ചറിയാനുള്ള നടപടികൾ പുരോഗമിക്കുകയാണ്." മഹാകുംഭ ഡിഐജി വൈഭവ് കൃഷ്ണ ഒരു പത്രസമ്മേളനത്തിൽ പറഞ്ഞു.ഗംഗ, യമുന, സരസ്വതി എന്നിവയുടെ സംഗമസ്ഥാനമായ ത്രിവേണി സംഗമത്തിലും മഹാകുംഭത്തിനായി 12 കിലോമീറ്റർ നീളമുള്ള നദീതീരങ്ങളിലെ മറ്റ് എല്ലാ ഘട്ടുകളിലും തിങ്ങിനിറഞ്ഞ ജനക്കൂട്ടത്തിനിടയിലാണ് പുലർച്ചെ 2 മണിയോടെ സംഭവം നടന്നത്. നിരവധി പേർക്ക് പരിക്കേറ്റു, നിരവധി കുടുംബങ്ങൾ ഒറ്റപ്പെട്ടുപോയതായി ദൃക്‌സാക്ഷികൾ ഇന്ത്യാ ടുഡേ ടിവിയോട് പറഞ്ഞു.