ലൈംഗികാതിക്രമ കേസില്‍ കര്‍ണാടകയില്‍ ബിജെപി എംഎല്‍എ അറസ്റ്റില്‍

ജാതി അധിക്ഷേപ കേസില്‍ ജാമ്യം ലഭിച്ച്‌ ജയില്‍ നിന്ന് പുറത്തിറങ്ങി നിമിഷങ്ങള്‍ക്കുള്ളിലാണ് വീണ്ടും അറസ്റ്റ്.

പലപ്പോഴായി മുനിരത്ന ലൈംഗിക പീഡനത്തിന് ഇരയാക്കിയെന്ന 40കാരിയുടെ പരാതിയുടെ അടിസ്ഥാനത്തിലാണ് എംഎല്‍എക്കെതിരെ പൊലീസ് കേസെടുത്തത്. രാമനഗര പൊലീസ് രജിസ്റ്റർ ചെയ്ത കേസിലാണ് മുനിരത്നയെ ഇപ്പോള്‍ അറസ്റ്റ് ചെയ്തത്. യുവതിയെ മെഡിക്കല്‍ പരിശോധനയ്ക്ക് വിധേയമാക്കുകയും മൊഴി രേഖപ്പെടുത്തി അന്വേഷണം നടത്തുകയും ചെയ്തതിന് പിന്നാലെയാണ് ബിജെപി നേതാവിന്റെ അറസ്റ്റ്.

അതേസമയം ബെംഗളൂരു വയലിക്കാവല്‍ പൊലീസ് സ്‌റ്റേഷനില്‍ രജിസ്റ്റർ ചെയ്ത ജാതി അധിക്ഷേപ കേസുമായി ബന്ധപ്പെട്ട് ഇയാളെ സെപ്തംബർ 14നാണ് പൊലീസ് അറസ്റ്റ് ചെയ്തത്. കോലാറിലെ മുളബാഗല്‍ താലൂക്കില്‍ നിന്നായിരുന്നു അറസ്റ്റ് ചെയ്തത്. കേസില്‍ ബെംഗളൂരു കോടതി വ്യാഴാഴ്ചയാണ് ജാമ്യം അനുവദിച്ചത്. വെള്ളിയാഴ്ച ജയില്‍ വിടുമെന്ന് വ്യക്തമായതോടെ രാമനഗര പൊലീസ് സംഘം സെൻട്രല്‍ ജയിലിലെത്തുകയും അറസ്റ്റ് രേഖപ്പെടുത്തുകയുമായിരുന്നു.