നെടുമങ്ങാട് ടൂറിസ്റ്റ് ബസ് അപകടം: ഡ്രൈവറുടെ ലൈസൻസും വാഹനത്തിൻ്റെ ആർസിയും റദ്ദാക്കി മോട്ടോർ വാഹന വകുപ്പ്

നെടുമങ്ങാട് ഇരിഞ്ചയത്ത് ടൂറിസ്റ്റ് ബസ് അപകടത്തിൽ പെട്ട സംഭവത്തിൽ നടപടിയുമായി മോട്ടോർ വാഹന വകുപ്പ്. അപകടത്തിൽപെട്ട ടൂറിസ്റ്റ് ബസിൻ്റെ ഫിറ്റ്നസും ആർസിയും റദ്ദാക്കി. വാഹനമോടിച്ചിരുന്ന ഒറ്റശേഖരമംഗലം സ്വദേശി അരുൾ ദാസിൻ്റെ ലൈസൻസും റദ്ദാക്കിയിട്ടുണ്ട്.

ഡ്രൈവർക്കും അപകടത്തിൽ സാരമായി പരിക്കേറ്റിട്ടുണ്ട്. കണ്ണിൻ്റെ പുരികത്തിൽ ഇയാൾക്ക് ചെറിയ പരിക്ക് പറ്റിയിട്ടുണ്ടെന്നാണ് വിവരം. കാട്ടാക്കടയിലെ സ്വകാര്യ ആശുപത്രിയിൽ ചികിത്സ തേടിയ ശേഷം സുഹൃത്തിൻ്റെ വീട്ടിൽ അഭയം തേടുകയായിരുന്നു. തുടർന്ന് വിവരമറിഞ്ഞ നെടുമങ്ങാട് പോലീസ് ഡ്രൈവറെ കസ്റ്റഡിയിൽ എടുത്തത്. അലക്ഷ്യമായി വാഹനം ഓടിച്ച് ജീവൻ നഷ്ടപ്പെടുത്തിയതിനാണ് ഇയാളെ പോലീസ് അറസ്റ്റ് ചെയ്തത്.

ഇന്നലെ രാത്രിയാണ് വിനോദയാത്ര സംഘം സഞ്ചരിച്ച ടൂറിസ്റ്റ് ബസ് ഇരിഞ്ചയത്ത് വെച്ച് അപകടത്തിൽപെട്ടത്. രാത്രി 10.15-ഓടെ എസ്എൻഡിപി ഓഫീസിന് വളവിന് സമീപത്ത് വെച്ചായിരുന്നു അപകടം. ഇബറോൺ ഹോളിഡേയ്സ് (കെഎൽ - 21 - ക്യു - 9050) എന്ന ബസാണ് അപകടത്തിൽ പെട്ടത്. അപകടത്തിൽ 60 വയസുള്ള ദാസിനി മരിച്ചിരുന്നു. കുട്ടികളുൾപ്പെടെ നിരവധി പേർക്ക് പരുക്കേൽക്കുകയും ചെയ്തിരുന്നു.