ക്ലോസറ്റിൽ ഉഗ്ര വിഷമുള്ള മൂർഖൻ! യുവാവ് രക്ഷപെട്ടത് തലനാരിഴയ്ക്ക്

ബെഡ്റൂമിലും അലമാരയിലും ഷൂസിലും എന്തിന്, ഹെൽമറ്റിൽ വരെ പാമ്പ് കയറുന്നത് കണ്ടിട്ടുണ്ടാകും. എന്നാൽ കഴിഞ്ഞദിവസം രാജസ്ഥാനിലെ അജ്മീർ ഗ്യാൻവിഹാറിൽ ഒരു വീട്ടിൽ മൂർഖനെ കണ്ടെത്തിയത് ബാത്ത്റൂമിലെ ക്ലോസറ്റിൽ നിന്നാണ്. സംഭവത്തിന്റെ ഭയപ്പെടുത്തുന്ന വീഡിയോ സമൂഹമാദ്ധ്യമങ്ങളിൽ പ്രചരിക്കുന്നുണ്ട്.  

ക്ലോസറ്റിൽ ചുരുണ്ടുകൂടിക്കിടക്കുന്ന മൂർഖനെ വീഡിയോയിൽ കാണാം. ഇത് കുടുംബത്തെ ഞെട്ടിക്കുകയും പരിഭ്രാന്തരാക്കുകയും ചെയ്തു. ഇതിന്റെ വീഡിയോ പകർത്തുന്നതിനിടെ യുവാവിന് നേരെ കടിക്കാനായി ചീറ്റുന്ന മൂർഖനേയും വീഡിയോയിൽ കാണാം. ചീറ്റിയപ്പോൾ ഉടൻ തന്നെ പിന്നിലേക്ക് മാറിയതിനാൽ വലിയ അപകടം ഒഴിവായി. "കോബ്ര ടീം രാജസ്ഥാൻ" എന്ന വന്യജീവി രക്ഷാ സംഘം എത്തിയാണ് മൂർഖനെ അവിടെ നിന്നും മാറ്റിയത്. സംഘത്തിന്റെ സ്ഥാപകനായ സുഖ്‌ദേവ് ഭട്ട് തന്റെ സഹപ്രവർത്തകരോടൊപ്പം സ്ഥലത്തെത്തി ഏകദേശം 30 മിനിറ്റ് നീണ്ടുനിന്ന സൂക്ഷ്മമായ രക്ഷാപ്രവർത്തനത്തിലൂടെ പാമ്പിനെ കീഴ്പ്പെടുത്തി. പെൺ മൂർഖൻ പാമ്പാണെന്ന് തിരിച്ചറിഞ്ഞതിനെ സുരക്ഷിതമായി നീക്കം ചെയ്യുകയും പിന്നീട് അതിന്റെ സ്വാഭാവിക ആവാസ വ്യവസ്ഥയിലേക്ക് വിടുകയും ചെയ്തു.