അമേരിക്കയുമായുള്ള കരാർ: വെനിസ്വേലൻ എണ്ണ വില്പന 200 കോടി ഡോളറിലേക്ക്; ഇന്ത്യയും യൂറോപ്പും ഇറക്കുമതി വർദ്ധിപ്പിച്ചു

അമേരിക്കയും വെനിസ്വേലയും തമ്മിലുള്ള പുതിയ എണ്ണ വിതരണ കരാർ പ്രകാരം ഈ മാസം അവസാനത്തോടെ വെനിസ്വേലയുടെ എണ്ണ വില്പന 200 കോടി ഡോളറിലെത്തുമെന്ന് റിപ്പോർട്ട്. പ്രസിഡന്റ് ഡൊണാൾഡ് ട്രംപ് ഭരണകൂടം വെനിസ്വേലയുടെ എണ്ണ വിപണിയിൽ നിയന്ത്രണം ഏറ്റെടുത്തതിന് പിന്നാലെയാണ് ഈ വൻ കുതിച്ചുചാട്ടം ഉണ്ടായിരിക്കുന്നത്. ഇതോടെ മാസങ്ങളായി വിപണിയിൽ നിന്ന് വിട്ടുനിന്ന വെനിസ്വേലൻ ക്രൂഡ് ഓയിൽ ഏഷ്യയിലേക്കും യൂറോപ്പിലേക്കും വലിയ തോതിൽ തിരിച്ചെത്തിത്തുടങ്ങി. പ്രധാനമായും ഇന്ത്യ, അമേരിക്കൻ ഗൾഫ് തീരം, യൂറോപ്യൻ രാജ്യങ്ങൾ എന്നിവയാണ് ഇപ്പോൾ വെനിസ്വേലൻ എണ്ണയുടെ പ്രധാന ആവശ്യക്കാർ.

ഫെബ്രുവരി അവസാനത്തോടെ ഏകദേശം 40 ദശലക്ഷം ബാരൽ എണ്ണ വില്പന നടത്താനാണ് ലക്ഷ്യമിടുന്നത്. ആഗോള വ്യാപാര സ്ഥാപനങ്ങളായ വിറ്റോൾ (Vitol), ട്രഫിഗുറ (Trafigura) എന്നിവർക്കാണ് എണ്ണ വിതരണത്തിന്റെ പ്രധാന ചുമതല നൽകിയിരിക്കുന്നത്. അതേസമയം ഷെവ്‌റോൺ (Chevron) പോലുള്ള അന്താരാഷ്ട്ര കമ്പനികൾ വെനിസ്വേലയിലെ എണ്ണ ഉത്പാദനം വർദ്ധിപ്പിക്കാനുള്ള നടപടികൾ വേഗത്തിലാക്കി. വെനിസ്വേലൻ സമുദ്രത്തിൽ സൂക്ഷിച്ചിരുന്ന ദശലക്ഷക്കണക്കിന് ബാരൽ എണ്ണയാണ് ഇപ്പോൾ വിപണിയിലേക്ക് എത്തിക്കുന്നത്.

ഇന്ത്യൻ റിഫൈനറികൾ വലിയ തോതിലാണ് വെനിസ്വേലൻ എണ്ണയ്ക്കായി ഓർഡറുകൾ നൽകുന്നത്. ഇതിനായി 20 ലക്ഷം ബാരൽ വരെ വഹിക്കാൻ ശേഷിയുള്ള കൂറ്റൻ കപ്പലുകൾ (VLCC) ചാർട്ടർ ചെയ്തുകഴിഞ്ഞു. റഷ്യൻ എണ്ണ ഇറക്കുമതി കുറയ്ക്കാൻ ഇന്ത്യ തീരുമാനിച്ചതിന് പിന്നാലെയാണ് വെനിസ്വേലൻ എണ്ണയെ ഇന്ത്യ കൂടുതൽ ആശ്രയിക്കുന്നത്. റിലയൻസ് ഇൻഡസ്ട്രീസ് ഉൾപ്പെടെയുള്ള പ്രമുഖ ഇന്ത്യൻ കമ്പനികൾ വെനിസ്വേലൻ എണ്ണ ഇറക്കുമതി പുനരാരംഭിച്ചു. ഇത് ഇന്ത്യയുടെ ഇന്ധന ഇറക്കുമതി ചിലവ് കുറയ്ക്കാൻ സഹായിക്കുമെന്നാണ് സാമ്പത്തിക വിദഗ്ധർ വിലയിരുത്തുന്നത്.